Þessi lifrarréttur, sem ættaður er frá Armeníu, er mjög einfaldur en góður. Lifur og grænmeti er skorið í bita, sett í ofnskúffu, kryddað og bakað stutta stund.
1 lambalifur
1 stór græn paprika
3-4 tómatar
Nýmalaður pipar
Salt
1-2 hvítlauksgeirar
3 msk. smjör
1 msk. þurrkuð mynta
1 sítróna
Hitið grillið í ofninum. Hreinsið lifrina og skerið hana í teninga, um 3 sm á kant. Fræhreinsið paprikuna og skerið hana í ræmur. Skerið tómatana í báta. Blandið öllu saman á álpappírsklæddri bökunarplötu eða í ofnskúffu og kryddið með pipar og salti. Saxið hvítlaukinn smátt og setjið í pott ásamt smjöri, myntu og safanum úr sítrónunni. Hitið þar til smjörið er bráðið. Hellið því þá yfir lifrar- og grænmetisblönduna og hrærið. Setjið í ofninn, nálægt grillristinni, og grillið í um 10 mínútur, eða þar til lifrin er rétt steikt í gegn og grænmetið farið að brúnast. Hrærið í öðru hverju.
Berið fram t.d. með krydduðum hrísgrjónum eða bulgurkorni.