Lamba- og kindakjöt er mikið borðað í flestum Arabalöndum, allt frá Marokkó austur til Saudi-Arabíu og Íraks, og er algengast að kjötið sé soðið í ýmiss konar pottréttum eða grillað. Það er gjarna töluvert mikið kryddað og krydd eins og kóríander, kummin, kanell og chili eru algeng.
12-16 lambakótilettur
3 hvítlauksgeirar, saxaðir smátt
3 msk ólífuolía
1 msk paprikuduft
1 msk kóríanderfræ, steytt
1 msk kummin, steytt
2 tsk kanell
negull á hnífsoddi
chilipipar á hnífsoddi salt
Nær öll fita skorin af kótilettunum og beinið hreinsað, þannig að hryggvöðvinn einn sé eftir. Best er auðvitað að gera þetta áður en kótiletturnar eru sagaðar. Settar í skál og síðan er hvítlauk og olíu dreift yfir og kótilettunum velt upp úr blöndunni. Öllu kryddinu blandað saman í lítilli skál, stráð yfir kótiletturnar og þeim velt fram og aftur. Sett í kæli í 3-4 klst og hrært öðru hverju.
Útigrill eða grillið í ofninum hitað, kótiletturnar saltaðar og grillaðar í 3-4 mínútur á hvorri hlið.